Monday, 28 November 2011

கனிமொழிக்கு ஜாமீன் கிடைத்தது

டெல்லி: 2ஜி ஸ்பெக்ட்ரம் வழக்கில் கைதாகியுள்ள திமுக ராஜ்யசபா எம்.பி. கனிமொழி, கலைஞர் டிவி நிர்வாகி சரத்குமார் ரெட்டி உள்ளிட்ட 5 பேருக்கு ஜாமீன் வழங்கி டெல்லி உயர் நீதிமன்றம் இன்று உத்தரவிட்டது. இதையடுத்து திமுக தரப்பு பெரும் மகிழ்ச்சியில் ஆழ்ந்துள்ளது.

இவர்கள் தவிர குசேகாவ்ன் புரூட்ஸ் மற்றும் வெஜிடபிள் நிறுவனத்தின் இயக்குனர்கள் ஆசிப் பல்வா, ராஜீவ் அகர்வால், பாலிவுட் திரைப்படத் தயாரிப்பாளர் கரீம் மொரானி ஆகியோருக்கும் ஜாமீன் வழங்கி டெல்லி உயர் நீதிமன்றம் ஜாமீன் கோரி ஆகியோரும் தங்களின் ஜாமீன் மனுக்களை விரைந்து விசாரிக்க வேண்டும் என்று நீதிமன்றத்திடம் கோரிக்கை விடுத்தனர்.

கனிமொழி கடந்த மே மாதம் 20ம் தேதி கைது செய்யப்பட்டு 6 மாதங்களாக (சரியாக 192 நாட்கள்) திகார் சிறையில் இருந்து வந்தார். அவரது ஜாமீன் மனுக்கள் 4 முறை டெல்லி பாட்டியாலா சிபிஐ விசாரணை நீதிமன்றத்தில் தள்ளுபடி செய்யப்பட்டு விட்டது. இந்நிலையில் அவர் மீண்டும் ஜாமீன் கோரி டெல்லி உயர் நீதிமன்றத்தில் மனு தாக்கல் செய்தார். அந்த மனு மீதான விசாரணை வரும் டிசம்பர் மாதம் 1ம் தேதி நடக்கும் என்று உயர் நீதிமன்றம் அறிவித்திருந்தது.

இந்நிலையில் முன்னாள் தொலைத் தொடர்புத்துறை அமைச்சர் ராசாவுடன் கூட்டு சேர்ந்து முறைகேடாக ஸ்பெக்ட்ரம் பெற்றதாக குற்றம் சாட்டப்பட்ட ஸ்வான் டெலிகாம் நிறுவனத்தின் இயக்குனர் வினோத் கோயங்கா, அனில் அம்பானியின் ரிலையன்ஸ் கம்யூனிகேஷன்ஸ் நிறுவன அதிகாரிகள் ஹரி நாயர், கௌதம் தோஷி, சுரேந்திர பிபாரா மற்றும் யூனிடெக் வயர்லெஸ் நிறுவனத்தின் நிர்வாக இயக்குனர் சஞ்சய் சந்திரா ஆகியோருக்கு நேற்று முன்தினம் ஜாமீன் வழங்கி உச்ச நீதிமன்றம் உத்தரவிட்டது.

அவர்களுக்கு ஜாமீன் கிடைத்த சில மணி நேரத்திலேயே தனது ஜாமீன் மனுவை விரைந்து விசாரிக்குமாறு கனிமொழி சார்பில் டெல்லி உயர் நீதிமன்றத்தில் மனு தாக்கல் செய்தார்.

அதேபோல, தொலைத்தொடர்புத் துறை முன்னாள் செயலர் சித்தார்த் பெகுரா, கலைஞர் டி.வி. நிர்வாக இயக்குநர் சரத் குமார், பாலிவுட் திரைப்படத் தயாரிப்பாளர் கரீம் மொரானி, குசேகாவ்ன் நிறுவனத்தின் இயக்குநர்கள் ஆசிப் பல்வா, ராஜீவ் அகர்வால் ஆகியோரும் தங்களின் ஜாமீன் மனுக்களை விரைந்து விசாரிக்க வேண்டும் என்று நீதிமன்றத்திடம் கோரிக்கை விடுத்தனர்.

இந்த மனுக்கள் முதலில் டிசம்பர் 1ம் தேதி விசாரிக்கப்படுவதாக இருந்தது. இருப்பினும் மேற்கண்டோரின் கோரிக்கையைத் தொடர்ந்து வெள்ளிக்கிழமை காலை 10.30 மணியளவில் இவர்களின் மனுக்கள் விசாரிக்கப்படும் என டெல்லி உயர் நீதிமன்றம் அறிவித்தது.

அதன்படி வெள்ளிக்கிழமை இவர்களின் ஜாமீன் மனுக்கள் விசாரணைக்கு வந்தன. அப்போது இவர்களது ஜாமீன் மனுக்களை சிபிஐ எதிர்க்கவில்லை.

விசாரணையின்போது கனிமொழியின் வக்கீலைப் பார்த்து நீதிபதி வி.கே.ஷாலி, ஐந்து தொலைத் தொடர்பு நிறுவனங்களின் அதிகாரிகளுக்கு சுப்ரீம் கோர்ட் ஜாமீன் அளித்து விட்டது, எனவே மற்றவர்களையும் விட்டு விட வேண்டும் என்று சொல்ல வருகிறீர்களா? உயர்நீதிமன்றம் இதை மட்டுமே கருத்தில் கொள்ள வேண்டும். மற்றவற்றைப் பரிசீலிக்கக் கூடாது என்று கூற வருகிறீர்களா என்று கேட்டார்.

இதையடுத்து விசாரணையை திங்கள்கிழமை வரை நீதிபதி ஷாலி ஒத்திவைத்து உத்தரவிட்டார். இதனால் கனி்மொழி தரப்பு நம்பிக்கை இழந்த நிலையில், கடும் ஏமாற்றமடைந்தது.

இந் நிலையில் இன்று இந்த மனுக்கள் மீண்டும் விசாரணைக்கு வந்தபோது கனிமொழி, சரத்குமார், ஆசிப் பல்வா, ராஜீவ் அகர்வால், கரீம் மொரானி ஆகியோருக்கு ஜாமீன் வழங்கி நீதிபதி உத்தரவிட்டார். இவர்கள் யாரும் நாட்டை விட்டு வெளியே செல்லக் கூடாது என்றும் நீதிபதி நிபந்தனை விதித்தார்.

அதே நேரத்தில் முன்னாள் தொலைத் தொடர்புத்துறைச் செயலாளர் சித்தார்த் பெகுராவுக்கு ஜாமீன் வழங்க சிபிஐ எதிர்ப்புத் தெரிவித்ததால், அவரது மனு மீதான விசாரணை நாளையும் தொடர உள்ளது.

இதில், கனிமொழி மீது சிபிஐ நம்பிக்கை துரோகம் செய்யும் வகையில் கிரிமினல் சதித் திட்டம் தீட்டுவது, கிரிமினல் சதி, ஏமாற்றுதல், மோசடி, ஊழல் ஆகிய பிரிவுகளின் கீழ் வழக்குப் பதிவு செய்துள்ளது குறிப்பிடத்தக்கது.

ஜாமீன் வழங்கப்பட்டுவிட்ட நிலையில், டெல்லி உயர் நீதிமன்றத்தின் உத்தரவு, டெல்லி பாட்டியாலா சிபிஐ விசாரணை நீதிமன்றத்துக்கு அனுப்பப்படும். அங்கு பார்மலிட்டீஸ் எல்லாம் முடிந்த பின்னர், திகார் சிறைக்கு உத்தரவு அனுப்பப்படும்.

இதன் பின்னரே கனிமொழி உள்ளிட்டோர் இன்று இரவு அல்லது நாளை காலை தான் விடுதலை செய்யப்படுவர் என்று தெரிகிறது.

இந்த 2ஜி வழக்கில் இவர்களையும் சேர்த்து மொத்தம் 10 பேருக்கு ஜாமீன் கிடைத்துள்ளது குறிப்பிடத்தக்கது.

இவர்கள் தவிர முன்னாள் தொலைத் தொடர்புத்துறை அமைச்சர் ராசா, பெகுரா உள்பட மேலும் 4 பேர் தொடர்ந்து சிறையில் அடைக்கப்பட்டுள்ளது குறிப்பிடத்தக்கது.

இந்த வழக்கில் சம்பந்தப்பட்ட யாருக்கும் கடந்த 7 மாதம் ஜாமீன் தரப்படவில்லை என்பதும், சிபிஐ நீதிமன்றத்தில் குற்றச்சாட்டு பதிவு செய்யப்பட்ட பின்னர் ஜாமீன் கோரலாம் என்று உச்ச நீதிமன்றம் கூறியும், கனிமொழிக்கு ஜாமின் கிடைக்கவில்லை. இதை மூத்த வழக்கறிஞர் ராம் ஜேத்மலானி எதிர்த்திருந்தார். கனிமொழிக்கு ஜாமீன் மறுப்பது சட்ட விரோதம் என்றும் கருத்து தெரிவித்திருந்தார்.

இந்நிலையில் யுனிடெக் வயர்லெஸ் நிறுவன முன்னாள் இயக்குனர் சஞ்சய் சந்திரார், ஸ்வான் டெலிகாமின் வினோத் கோயங்கா, அனில் அம்பானியின் ரிலையன்ஸ் டெலிகாம் அதிகாரிகள் கெளதம் தோஷி, ஹரி நாயர், மற்றும் சுரேந்திர பிபாரா ஆகியோருக்கு கடந்த 23ம் தேதி உச்ச நீதிமன்றம் ஜாமீன் வழங்கியது.

இதன் மூலமே இப்போது கனிமொழி உள்ளிட்டோருக்கும் ஜாமீன் கிடைத்துள்ளது.

எல்லை மீறும் ஊடக பயங்கரவாதம்

இந்தியக் குடிமக்களுள் நெற்றியில் நாமம் தீட்டிய அல்லது நீறு பூசிய எவரும் தீவிரவாத இந்து அல்லர்; நெஞ்சில் சிலுவை அணிந்த எவரும் கிருத்துவ தீவிரவாதி அல்லர். ஆனால், தொப்பி அணிந்து தாடி வளர்த்திருந்தால் அவர் 'முஸ்லிம் தீவிரவாதி' என்பதை நமது தொலைக்காட்சி/அச்சு ஊடகங்கள் தீர்மானித்து வைத்திருக்கின்றன. குறைந்த பட்சம் முஸ்லிம் பெயர் ஒருவருக்கு இருந்தால் மட்டும் போதும்; அவர் தீவிரவாதி என அடையாளப்படுத்துவதற்கு எல்லாச் சாத்தியங்களும் இருக்கின்றன என்பதுபோல் நமது பெரும்பாலான ஊடகங்கள் செயல்படுகின்றன. 
பாகிஸ்தானில் பதுங்கிக் கிடக்கும் 'அதிபயங்கரமான ஐம்பது முஸ்லிம் தீவிரவாதிகள்' பட்டியல் ஒன்றை அண்மையில் நமது உள்துறை அமைச்சகம் தயாரித்தது. அதைப் பாகிஸ்தான் அரசிடம் கொடுத்து, "இவர்களை இந்தியாவிடம் ஒப்படைக்கவேண்டும்" என்றும் கேட்டுக் கொண்டது. 
நமது ஊடகங்களுக்கு இதைவிட வேறு தீனி வேண்டுமா? பேனைப் பெருச்சாளியாக்கி, நம் நாட்டின் எல்லா மொழி ஊடகங்களும் அதை எழுதித் தள்ளின  
பாகிஸ்தானில் பதுங்கியிருப்பதாகச் சொல்லப்பட்ட மேற்படி தீவிரவாதிகள் பட்டியலில் இருந்த வாஜுல் கமர் கான் என்பவர், இந்தியாவின் மும்பையை அடுத்துள்ள தானேவில்தான் பல ஆண்டுகளாக வாழ்ந்து வருகிறார் என்கிற உண்மை சில நடுநிலை ஊடகங்கள் மூலம் வெளிவந்தது. உடனே இதற்கு விளக்கமளித்த மத்திய உள்துறை அமைச்சர் சிதம்பரம், "... சிறிய தவறு நடந்துவிட்டது. இத்தவறுக்கு நான் பொறுப்பேற்கிறேன்" என்று பெருந்தன்மையாக அறிவித்தார். 
அடுத்த சில நாட்களில் இரண்டாவது 'சிறிய தவறு' வெளிவந்தது. அதே 'அதிபயங்கரமானவர்களின் பட்டியலில்' 24ஆவது ஆளாக இருக்கும் இன்னொரு தீவிரவாதியான ஃபெரோஸ் அப்துல் ரஷீத் கானும் இந்தியாவில்தான் இருக்கிறார் என்கிற உண்மை அம்பலமானது. முதல் தீவிரவாதியான வாஜுல் கமர் கான் என்பவராவது தானேவில் வசிக்கும் சாதாரண இந்திய முஸ்லிம். இரண்டாமவரான ஃபெரோஸ் அப்துல் ரஷீத் என்பவர் ஏற்கனவே 1993இல் மும்பையில் நடைபெற்ற வெடிகுண்டு வழக்கில் 'சேர்க்கப்பட்டு'க் கடந்த 2010 பிப்ரவரி மாதம் கைதாகிச் சிறையில் இருப்பவர். http://articles.timesofindia.indiatimes.com/2011-05-20/india/29563936_1_arthur-road-jail-mumbai-jail-special-tada-court 
மும்பை (ஆர்தர் சாலை) சிறையில் இருக்கும் ஃபெரோஸ் கானுக்கு எதிராக இண்டர்போலில் புகார் செய்து "தேடப்படும் குற்றவாளி" ஃபெரோஸ் கானுக்கு எதிராக ஒரு பிடி வாரண்ட்டையும் வாங்கி வைத்துக் கொண்டு ஏறத்தாழ இரண்டாண்டுக்கும் மேலாக உலகமெல்லாம் தேடியலைந்துள்ளது நமது புலனாய்வுத்துறை. அது மட்டுமின்றி, மும்பைச் சிறையிலிருக்கும் ஃபெரோஸைப் பாகிஸ்தானில் 'பதுங்கி'க் கொண்டிருப்பதாகவும், இந்தத் தீவிரவாதியைப் பிடிப்பதற்குப் பாகிஸ்தான் ஒத்துழைக்கவில்லை என்று குற்றம் சுமத்தியும் வந்தது. 
நமது நடு(!)நிலை ஊடகங்கள் பலவும் 'தேடப்படும் முஸ்லிம் தீவிரவாதி'களைப் பற்றித் தலைப்புச் செய்தி போட்டுத் தங்களது சேவையைச் செவ்வனே செய்தன. 
*****
ஏறத்தாழ இதேபோன்று ஒரு செய்தியை, சன் குழுமத்தின் நம்பர் ஒன்(?) மாலை இதழான 'தமிழ் முரசு' கடந்த 23.11.2011இல் தலைப்பாக்கி வெளியிட்டது. 
தலைப்பு: "8 ஆண்டுகளாகத் தேடப்பட்டு வந்த தீவிரவாத இயக்கத் தலைவர் கைது!" http://www.tamilmurasu.org/Inner_Tamil_News.asp?Nid=16943 
அதிரையைச் சேர்ந்த, தவ்ஃபீக்கைக் காவல்துறை 8 ஆண்டுகளாகத் தேடி வந்ததாகத் தலைப்பில் மட்டுமின்றி செய்தியின் உள்ளேயும் அழுத்தம் திருத்தமாக தமிழ் முரசு நாளிதழ் கூறியுள்ளது. காணொளியாக சன் தொலைக்காட்சியில் செய்தியும் சொல்லப்பட்டது. 
தமிழ் முரசு நாளிதழின் இதே செய்தியை அதே "8 ஆண்டுகள் ..." தலைப்பிட்டு நெல்லை ஆன்லைன், தன் செய்தியைப் போன்று அப்படியே வாந்தி எடுத்துப் பதித்துள்ளது. http://nellaionline.net/view/32_24021/20111123164224.html 
இதே செய்தியை தி ஹிண்டுவும் ஆங்கிலத்தில் செய்தி வெளியிட்டது. http://www.thehindu.com/news/states/other-states/article2651009.ece?homepage=true  பொடா சட்டத்தில் வழக்கு பதிவு செய்யப்பட்டுள்ளதாகக் கூறும் இந்து நாளிதழ் மற்றொரு இடத்தில் 2008ஆம் ஆண்டு தவ்ஃபீக் பிணையில் வெளிவந்ததாகவும் கூறுகிறது. பொடா சட்டத்தில் கைது செய்யப்பட்டவர் பிணையில் வெளிவருவது சுலபம் அல்ல என்பது இந்து நாளிதழுக்குத் தெரியாததன்று. பின் எந்த வழக்கில் அவர் பிணையில் வந்தார் என்பதையும், அவர்மீது போடப்பட்ட பொடா சட்டத்தின் நிலை என்னவாயிற்று என்பதையும் இந்து நாளிதழ் அறிந்து கொள்ள விரும்பவில்லை.
8 ஆண்டுகள் தவ்ஃபீக்கைத் தேடியதில் என்னதான் சிக்கல்? 
கடந்த 2.12.2002இல் மும்பையின் அம்ருத் நகரிலிருந்து காட்கோபர் இரயில் நிலையத்துக்குச் சென்றுகொண்டிருந்த பேருந்து ஒன்றில் வெடிகுண்டு வெடித்து இருவர் பலியாயினர்; 49 பேர் காயமடைந்தனர். சுறுசுறு(!)ப்புக்குப் பேர்போன மும்பைக் காவல்துறை உடனடியாக, மும்பை ஜேஜே மருத்துவமனையில் பணியாற்றிய டாக்டர் முஹம்மது அப்துல் மத்தீன், ஷேக் முஹம்மது முஸம்மில், ஸாஹிர் அஹ்மது, இம்ரான் அஹ்மது கான், முஹம்மது அல்தாஃப் இஸ்மாயீல் ஆகிய ஐவரை மேற்காணும் வெடிகுண்டு வழக்கில் 'சேர்த்து' வழக்குப் பதிந்தது. ஆறாவது விசாரணைக் கைதியான ஸையித் காஜா யூனுஸ், காவல்துறை கஸ்ட்-அடியில் மரணமடைந்தார். பதறிப்போன மும்பைக் காவல்துறை, ஹைதராபாத் என்கவுண்ட்டரில் நவம்பர் 2002இல் போட்டுத் தள்ளப்பட்ட ஸையித் அஸீஸ் (எ) இம்ரானையும் தமிழ்நாட்டின் அதிராம்பட்டினத்தைச் சேர்ந்த தவ்ஃபீக்கையும் இந்த வழக்கில் 'சேர்த்து' அடுத்த வாரம் தாக்கல் செய்யப்போவதாக அறிவித்தது. மேலும், இவர்கள் அனைவரும் ஜெய்ஷே முஹம்மது, அல் காயிதா, லஷ்கரே தொய்பா, சிமி ஆகிய தீவிரவாத இயக்கங்களோடு தொடர்புடையவர்கள் என்பதாக வழக்கை ஜோடித்தது மும்பை காவல்துறை. http://articles.timesofindia.indiatimes.com/2003-04-10/mumbai/27270630_1_imran-rehman-khan-supplementary-chargesheet-mohammed-abdul-mateen 
பொடா சிறப்பு நீதிமன்றத்தில் வழக்கும் நடந்தது. 
குற்றம் சுமத்தப்பட்ட அனைவரையும், 11.6.2005இல் 'அப்பாவிகள்' எனத் தீர்ப்பளித்து நீதிமன்றம் விடுதலை செய்தது. அத்துடன் இவ்வழக்கில் தீர்ப்பு வழங்கிய சிறப்பு நீதிபதி அஷோக் பங்காலே, "இந்த வழக்கு அரசுத் தரப்பால் கட்டியெழுப்பப்பட்டது" என்று குட்டும் வைத்தார். http://www.milligazette.com/Archives/2005/01-15July05-Print-Edition/011507200529.htm 
இந்த வழக்கில் தவ்ஃபீக்கின் தொடர்பு என்ன? 
கடந்த 2002ஆம் ஆண்டு கொடுங்கையூரில் பதுக்கி வைக்கப்பட்டிருந்த நாற்பது டெட்டனேட்டர்களைக் காவல்துறையினர் 'கண்டு' எடுத்தனர். அவற்றை மறைத்து வைத்திருந்ததாகக் கூறி, தவ்ஃபீக்கை 26 நவம்பர் 2002இல் கைது செய்து சிறையில் அடைத்து, மூன்று நாள்கள் கழித்து, 29 நவம்பர் 2002இல் நீதிமன்றத்தின் ஆஜர் படுத்தினர். நீதிபதியின் உத்தரவின் பேரில் தவ்ஃபீக்கைக் காவல்துறை விசாரணைக் கைதியாக (வழக்கு எண் 681/2002) சிறையில் அடைத்தது. இச்செய்தியும் வழக்கம்போல் எல்லா ஊடகங்களிலும் வெளியானது. 
நவம்பர் 26இல் சென்னைக் காவல்துறையால் கைது செய்யப்பட்டு சிறைக்குள் இருந்த தவ்ஃபீக்கை, டிஸம்பர் 2இல் நடந்த காட்கோபர் பேருந்து குண்டு வெடிப்பை நிகழ்த்தியதாக மும்பைக் காவல் துறை குற்றம் சுமத்தி, தன் வழக்கில் புத்திசாலித் தனமாகச் 'சேர்த்து'க் கொண்டது. 
2002ஆம் ஆண்டு கைது செய்யப்பட்டு சிறையில் அடைக்கப்பட்ட தவ்ஃபீக், 2006ஆம் ஆண்டு நடைபெற்ற தமிழக சட்டமன்றத் தேர்தலில் சிறையில் இருந்தவாறே போட்டியிட்டார். http://www.elections.tn.gov.in/ECI/Affidavits/S22/SE/179/AC179CANDIDATE.htm 
பின்னர், கொடுங்கையூர் வழக்கு பிசுபிசுத்துப்போய் பிணையில் வெளிவந்தார் தவ்ஃபீக். என்றாலும் அவ்வப்போது முக்கிய அரசியல் தலைவர்கள் சென்னைக்கு வரும்போது தவ்ஃபீக்கைக் காவல்துறையினர் அழைத்துப் போய் சிறையில் வைத்திருந்து வெளியே விடுவது 2008வரை வழக்கமாகவே இருந்து வந்தது. 
அவ்வப்போது நமது புலனாய்வு(!) எழுத்தாளர்கள் சிலர், தவ்ஃபீக்கை சர்வதேச பயங்கரவாதி என்பதுபோல் சித்தரிப்பது தொடர்ந்தது. 
இரா. சரவணன் என்பவர் ஜூவியின் 25.5.2008 பதிப்பில் "டென்ஷனில் தமிழகம்! டேஞ்சரஸ் தவ்பீக்..." என்று தலைப்பிட்டு நல்ல கற்பனை வளத்துடன் ஒரு கட்டுரை எழுதினார்.
அவருடைய கற்பனை வளத்துக்குச் சான்றான பகுதி:
"ஜெய்ப்பூரிலும், சென்னையிலும் ஒரே சமயத்தில் குண்டுவெடிப்புகளை அரங்கேற்றத் திட்டம் தீட்டப்பட்டிருக்கிறது. உளவுத்துறை போலீஸாரின் சாமர்த்தியத்தால் நூலிழையில் சென்னை தப்பியிருக்கிறது. ஜெய்ப்பூர் குண்டு வெடிப்புக்குப் பொறுப்பேற்றிருக்கும் 'இந்தியன் முஜாகிதீன்' அமைப்புக்கும் தவ்பீக்குக்கும் தொடர்பு இருப்பதற்கான முதல்கட்ட ஆதாரங்கள் கிடைத்திருக்கின்றன. 'இந்தியன் முஜாகிதீன்' அமைப்பினரின் மெயில் மிரட்டலில் 'டெல்லி, மும்பை, சென்னை உள்ளிட்ட நகரங்களையும் தகர்ப்போம்' எனச் சொல்லி இருக்கிறார்கள். போலீஸ் தன் மீது கண் பதித்திருந்ததால்தான் தவ்பீக்கால் சென்னையைத் தகர்க்கும் அசைன்மென்ட்டை நிறைவேற்ற முடியாமல் போயிருக்கிறது. (ஜூனியர் விகடன் 25-5-2008 இதழிலிருந்து). 
இந்தப் பதிவுக்குப் பின்னர் ஜூவியைத் தொடர்பு கொண்டு தவ்ஃபீக்கைப் பற்றி உண்மைக்கு மாற்றமாக எழுதியதை அவருடைய குடும்பத்தார் விசாரித்தபோது, தவ்ஃபீக்கின் குடும்பத்தினரின் கருத்துகளையும் உண்மை அறியும் குழுத் தலைவரும் வழக்கறிஞருமான மனோகரனின் கருத்துகளைப் பெற்று, மூன்று மாதத்துக்குப் பின்னர் ஜூவி வெளியிட்டது. அதில்,  சர்வதேச மக்கள் வழக்கறிஞர் சங்கத்தின் பொதுச் செயலாளர் மனோகரன் கூறுகிறார்: 
'என்னை என்கவுன்ட்டர் செய்ய முயன்றால், தமிழகத்தையே குண்டு வைத்துத் தகர்ப்பேன்' என்று தவுபீக் சொன்னதாகச் சொல்கிறார்கள். மும்பை குண்டுவெடிப்பு வழக்கில் பொய்க்குற்றம் சுமத்தப் பட்ட தவுபீக், நீதிமன்றத்தால் விடுவிக்கப்பட்டு நிம்மதியாக வாழ்ந்துவந்தார். உளவுத்துறை, அவரைத் தங்களின் உளவாளியாக மாறச்சொல்லி நெருக்கடி கொடுத்தது. இதை எதிர்த்த காரணத்துக்காக, ஜெய்ப்பூர் குண்டு வெடிப்பில் அவரை சம்பந்தப்படுத்தியதுடன், இந்துத் தலைவர்களைக் கொல்ல சதித்திட்டம் தீட்டியதாகவும், சுற்றி வளைத்தபோது தப்பிவிட்டதாகவும் கதை கட்டியிருக்கிறார்கள். http://adiraixpress.blogspot.com/2008/08/blog-post_4794.html 
கடந்த 2008 மே மாதம் 17இல் ராஜஸ்தான் மாநிலம் ஜெய்ப்பூரில் ஐ.பி.எல். கிரிக்கெட் போட்டி நடத்த திட்டமிடப்பட்டு இருந்தது. அதற்கு நான்கு நாட்களுக்கு முன்னர் 13.5.2008இல் ஜெய்ப்பூரின் 9 இடங்களில் தொடர் குண்டுகள் வெடித்தன. பத்தாவது குண்டைக் கண்டுபிடித்துச் செயலிழக்கச் செய்தனர். அந்தத் தொடர் குண்டு வெடிப்புகளில் அப்பாவிகள் 63 பலியாயினர்; 216 பேர் படுகாயம் அடைந்தனர். அந்தத் தொடர் குண்டு வெடிப்பில் தொடர்புடையதாக மும்பையைச் சேர்ந்த விஜய் என்பவனை முதன்முதலாகக் காவல் துறை கைது செய்தது. http://www.adhikaalai.com/index.php?option=com_content&task=view&id=1618&Itemid=54 
வெடிகுண்டுகளை வெடிக்கச் செய்தால் தனக்கு 1 லட்சம் ரூபாய் தருவதாக ஆசைகாட்டி மீனா எனும் பெயருடைய பெண் கூறியதாகக் காவல்துறையினர் விஜயிடமிருந்து வாக்குமூலம் 'வாங்கினர்'. தொடர்ந்து மேலும் நால்வர் கைது செய்யப்பட்டனர். http://tamil.oneindia.in/news/2008/05/14/india-60-killed-150-injured-as-terror-strikes-raja.html 
ஜெய்ப்பூர் தொடர் குண்டு வெடிப்புக்கு ஆர் டி எக்ஸ் எனும் சக்தி வாய்ந்த வெடிமருந்து பயன்படுத்தப்பட்டது கண்டுபிடிக்கப்பட்டது. ஆர் டி எக்ஸ் என்பது இராணுவத்தில் பயன்படுத்தப்படுவது. நமது இராணுவத்துக்குச் சொந்தமான ஆர் டி எக்ஸ் வெடிமருந்துகளில் பெரும்பகுதி, முன்னாள் இராணுவ அதிகாரி ஸ்ரீகாந்த் புரோஹித் மூலம் கடத்தப்பட்டு சங் பரிவாருக்கு சப்ளை செய்யப்பட்டதை அவரே ஒப்புக் கொண்டுள்ளார். http://www.satyamargam.com/1096 
மும்பை மாலேகான் ஸ்கூட்டர் குண்டு வெடிப்பில் சங் பரிவாரின் சாமியாரிணி சாத்வீ ப்ரக்யா சிங் தாகூரோடு முன்னாள் இராணுவ மேஜர் ரமேஷ் உபாத்யாயா என்பவரும் முன்னாள் இராணுவ மேஜர் பிரபாகர் குல்கர்னி என்பவரும் கைது செய்யப்பட்டனர். http://www.satyamargam.com/1078 
இந்தியாவில் நடந்த பெரும்பாலான குண்டுவெடிப்புகளுக்கு மூலகாரணமாக சங்பரிவாரங்களும் சாதுக்களும் சாமியார்களுமே இருக்கிறார்கள் என்று நிரூபனமான பிறகும் ஊடகங்களுக்கு மட்டும் இந்திய முஸ்லிம்கள் மீதான வன்மம் ஓயவில்லை! காவல்துறைக்கும் அப்பாவி முஸ்லிம்களைக் கைது செய்து இன்ஃபர்மர்களாக மாற்றும் திட்டம் மாறவில்லை. 
சென்னையில் தங்கியிருந்து கொண்டு 2008 மே மாத இறுதியில் குமுதம் ரிப்போர்ட்டருக்குப் பேட்டி கொடுத்த தவ்ஃபீக், ஜெய்ப்பூருக்குப் போய் குண்டு வைத்ததாகத் தமிழகக் காவல்துறை கதை புனைந்தது. பின்னர், அவரைத் தங்களுக்கு உளவு சொல்பவராக மாற்ற முயற்சி செய்தது.  அவர் மறுக்கவே, என்கவுண்டரில் போட்டுத் தள்ள அப்போதைய காவல்துறை முயன்றது. இதை தவ்ஃபீக் கூறுகிறார்: 
எனது வக்கீல் சந்திரசேகரின் பெசண்ட் நகர் வீட்டுக்கு இரவு ஏழு மணிக்குப் போனேன். அவர் வீட்டில் நான் போய்ச் சேர்ந்த பத்து நிமிடத்தில் அவருக்கு ஒரு போலீஸ் நண்பர் போன் செய்திருக்கிறார். வழக்குரைஞரின் முகமே வியர்த்துவிட்டது. என்னிடம் திரும்பியவர், `ஒருவரைச் சுட்டுக் கொல்வதற்காக என்கவுன்ட்டர் ஸ்பெஷல் டீம் எனது வீட்டை நோட்டம் விடுவதாகச் சொல்கிறார். யாரைச் சொல்கிறார்?' என்று கேட்டார். நான் இரண்டு நாளைக்கு முன்பு நடந்ததைப் பற்றிச் சொன்னேன். அவரும் தனது ஜூனியர்களை வெளியில் அனுப்பி பார்த்து வரச் சொன்னார். ஒரு ஆம்னி வேன், பைக் ஆகியவற்றில் மஃப்டி போலீஸார் இருந்தனர். அந்த நேரத்தில் தெருவில் லைட் ஆஃப் ஆனது. வக்கீல் வீட்டில் மட்டும் லைட் எரிந்தது. உடனே எனது இயக்கத்தவர்களுக்குத் தகவல் சொன்னேன். அவர்கள் ஒரு முப்பது பேர், ஜூனியர் வக்கீல்கள் எனத் திரண்டு வந்து என்னைத் தப்ப வைத்தனர். http://adiraixpress.blogspot.com/2008/05/blog-post_2465.html /  http://www.kumudam.com/magazine/Reporter/2008-05-25/pg4.php 
"எங்களுக்கு உளவு சொல்; இல்லையென்றால் நீ காலி" என மிரட்டிய காவல்துறையிடமிருந்து தப்பி, கடந்த மூன்றாண்டு காலமாக தலைமறைவு வாழ்க்கை நடத்திய தவ்ஃபீக் பட்ட துன்பங்கள் போதும்.
தவ்ஃபீக்கின் மீது சுமத்தப்பட்டுள்ள குற்றங்களுக்கு முறையான நேர்மையான விசாரணை நடைபெறவேண்டும். அதுவும் விரைந்து நடைபெறவேண்டும். அப்போது நீதி நிலைபெறும். அதுவரை, "8 ஆண்டுகள் தேடப்பட்ட..." கதை சொல்லும் ஊடகங்கள் அடக்கி வாசிக்கட்டும். 
2003ஆம் ஆண்டு காட்கோபரில் நிகழ்ந்த குண்டு வெடிப்பை 1999ஆம் ஆண்டு நடைபெற்றதாக செய்தி வெளியிட்டு தமிழ் முரசு நாளிதழ் தன்னுடைய அரைவேக்காட்டுத் தனத்தை வெளிப்படுத்தியது.
ஊடகங்களில் செயல்பாடுகளை அண்மையில்தான் பிரஸ் கவுன்சிலின் தலைவர் நீதிபதி மார்கண்டேய கட்ஜு கண்டித்திருந்தார். பதவியில் இருக்கும் நீதிபதிகளின் தீர்ப்பையே மதிக்காத ஊடகங்கள் வழக்கம் போலவே கட்ஜுவின் கண்டிப்பை பெரிதுபடுத்தவில்லை.
குடிமக்களே செய்தியாளர்களாக மாறியுள்ள சூழலில் இத்தகைய செய்திகளைத் தொடர்ந்து வெளியிட்டு வந்தால் மக்களின் நம்பிக்கையை இவை இழக்க நேரிடும் என்பதைச் சொல்லி வைக்கிறோம்.
***

முன்பு தௌபீக் மீது புனையப்பட்ட பல கேஸ்களில் மும்பை காட்கோபர்-ல் பஸ்ஸில் குண்டு வைத்ததாக புனையப்பட்ட கேசும் ஓன்று. அதில் முக்கிய சாட்சி அந்த பஸ்ஸின் கண்டக்டர். அவரிடம் குறுக்கு விசாரணை செய்த டிபென்ஸ் லாயர் திரு மஜீத் மேமன் : "நீங்கள் தௌபீக் -ஐ எங்கு கண்டீர்கள்?


கண்டக்டர் : "ஒரு பையை வைத்துவிட்டு அவசரமாக வெளியே இறங்கினார்"

திரு மஜீத் மேமன் "எப்பொழுது வெடித்தது"

கண்டக்டர் : "ஒரு சில நொடிகளில்"

இப்பொழுது ஜட்ஜின் பக்கம் திரும்பிய திரு மஜீத் மேமன் : "யூஆர் ஆனர், இங்கு கண்டக்டர் குறிப்பிட்ட நாள், நேரம் மாதத்திற்கு பல வாரங்களுக்கு முன்பாகவே வேறொரு கேசில் குற்றம் சாட்டப்பட்ட தௌபீக் சென்னை ஜுடிசியல் கஸ்டடி-ல் ரிமான்ட் செய்யப்பட்டு உள்ளே இருக்கிறார்" என்று சொல்லிவிட்டு நான் கொண்டு சென்றிருந்த டாகுமென்ட் களையும் ஜட்ஜின் பார்வைக்கு சமர்பித்தார்.

அதை நன்றாக பார்த்து பரிசீலனை செய்தபின் அதை ஆமோதித்து தலை அசைத்து திரு மஜீத் மேமனைப்பார்த்தார்.

இப்பொழுது மஜீத் மேமன் சொன்னது ஒட்டு மொத்த கோர்ட் வளாகத்தையும் சிரிப்பொலியால் அதிரவைத்தது.


"யு ஆர் ஆனர், இப்படி சிறைக்கம்பிகளுக்கு பின்னால் இருந்த என் கட்சிக்காரர் பலமான கம்பிகளை வளைத்து பல நூறு கிலோ மீட்டர் பறந்து வந்து இந்த வெடிப்பை ஏற்படுத்திவிட்டு மீண்டும் பறந்து சென்று சிறைக்கம்பிகளுக்குள் புகுந்து கொண்டார் என்று என் கட்சிக்காரரை சூப்பர் மேன் அளவுக்கு உயர்த்துவதை என்னால் நம்பமுடியவில்லை" என்று சொன்னதை ஜட்ஜ் உள்வாங்கிக் கொண்டு இலேசாக உடல் குலுங்க சிரித்துவிட்டார். அதே நேரம் கண்டக்டர் பம்பாய் போலீஸ் அதிகாரிகளை பார்த்தவிதம் "உங்களை எல்லாம் ............ டா" என்பதுபோல் இருந்தது.

*** 

கூடுதல் தகவல்களுக்கு 2008ஆம் ஆண்டு மே மாதம்
தவ்ஃபீக்கின் குமுதம் ரிப்போர்ட்டர் பேட்டி:
http://www.kumudam.com/magazine/Reporter/2008-05-25/pg4.php
http://adiraixpress.blogspot.com/2008/05/blog-post_2465.html
 
  நன்றி
  

சென்னை வெள்ளப்பகுதிகளில் உணவுப்பொட்டலம் விநியோகம்- மேயர் துரைசாமி பார்வையிட்டார்

சென்னை: சென்னையில் மழை வெள்ளம் பாதித்த பகுதிகளை மேயர் துரைசாமி பார்வையிட்டு உணவுப்பொட்டலங்களை வழங்கினார். பள்ளமான பகுதிகளில் தேங்கியுள்ள தண்ணீரை உடனடியாக வெளியேற்ற மேயர் உத்தரவிட்டுள்ளார்.

சென்னையில் பெய்த தொடர் மழை காரணமாக நகரமே வெள்ளக்காடாக மாறியுள்ளது. இதனையடுத்து வெள்ள சேதப் பகுதிகளை உடனடியாக பார்வையிட்டு நிவாரண பணிகளை மேற்கொள்ளுமாறு முதலமைச்சர் ஜெயலலிதா உத்தரவிட்டிருந்தார். இதனையடுத்து மழையால் பாதிக்கப்பட்ட பெரம்பூர், கொளத்தூர், அயனாவரம் உள்ளிட்ட வெள்ளச் சேதப் பகுதிகளை மேயர் சைதை துரைசாமி கொட்டும் மழையில் பார்வையிட்டார். பின்னர் அவர், செய்தியாளர்களிடம் பேசியதாவது:

முதலமைச்சர் ஜெயலலிதா உத்தரவுப்படி, மழைக்காலங்களில் பொதுமக்களுக்கு ஏற்படும் சிரமங்களை களையும் விதமாக தேங்கியுள்ள மழைநீரை அகற்றுதல், குப்பைகளை அகற்றுதல், பழுதடைந்த சாலைகளை தற்காலிகமாக சரிசெய்தல் மற்றும் மின்விளக்கு வசதி போன்ற குறைபாடுகளை களைதல் பணிகளை போர்க்கால அடிப்படையில் செய்து முடிக்க அதிகாரிகளுக்கு உத்தரவிடப்பட்டது.

சென்னை சுரங்கப்பாதைகளில் தேங்கியுள்ள தண்ணீரை இரவு, பகலாக 2 மோட்டார் பம்புகள் மூலம் வெளியேற்ற நடவடிக்கை எடுக்கப்பட்டு வருகிறது.

அயனாவரம் பகுதியில் ராகவன் தெரு, ஜமாலியா பூங்கா, உள்ளிட்ட மழையினால் பாதிக்கப்பட்ட பல்வேறு பகுதிகளை பார்வையிட்டு, பொதுமக்களின் குறைகளை கேட்டறிந்தோம்.

ஞாயிறுக்கிழமை இரவு முதல் கிரீம்ஸ் சாலை, திடீர் நகர், மக்கீஸ் கார்டன், ரங்கூன் தெரு, கோடம்பாக்கம் தர்மபுரம், நுங்கம்பாக்கம் கங்கைகரைபுறம் ஆகிய பகுதிகளில் உள்ள மழையினால் பாதிக்கப்பட்ட மக்களுக்கு உணவு பொட்டலங்கள் வழங்கப்படுகிறது. இதுவரை 20 ஆயிரம் உணவு பொட்டலங்கள் வழங்கப்பட்டுள்ளன. இவ்வாறு மேயர் சைதை துரைசாமி கூறினார்.

தொலைபேசியா? <அல்லது> தொல்லைபேசியா?

வீட்டில் உள்ள சூழலைப் போலவே வீட்டுக்கு உள்ள புறச் சூழலும் நம்முடைய பிள்ளைகள் மீது பெரும் தாக்கம் செலுத்துகின்றன. எனினும், ஒரு பிள்ளை வீட்டுக்கு வெளியில் உள்ள சமூகத்தை எதிர்க்கொள்ளும் சந்தர்ப்பங்களில் நெறிதவறிப் போய்விடாது இருப்பதற்கான பயிற்றுவிப்பு வீட்டில்,பெற்றோரின் வளர்ப்பில் வழங்கப்படவேண்டும் என்பதை யாரும் மறுக்கமுடியாது எனினும், அதனை மீறியும் பிள்ளைகள் தவறு செய்யக்கூடிய நிலைமைகளூம் இருக்கவேசெய்கின்றன.
தொலைபேசியா? தொல்லைபேசியா?
          தகவல் தொழில் நூட்பத்தில் முன்னேற்றங்கண்டுள்ள ஒரு யுகத்தில் இன்று நாம் வாழ்ந்து கொண்டு இருக்கின்றோம். ஒரு காலத்தில் ஆடம்பரப் பொருள்போல் வசதி உள்ளவர்களால் மட்டுமே பயன்படுத்தபட்டுவந்த தொலைபேசி அல்லது கைப்பேசி இன்று சர்வ சாதாரணமாக அன்றாட வாழ்வில் எத்தனையே நலன்கள் இருப்பது போலவே ஒருசில தீங்குகளூம் இருக்கவே செய்கின்றன எனலாம்.
         நம் குழந்தைகளைக் கல்வி கற்பதற்காக விடுதிகளில் தங்கவிடுகின்றோம். பேலதிக வகுப்புக்களுக்காக வெளியில் அனுப்புகிண்ட்றோம். அவசியமான நேரத்தில் அவர்களைத் தொடர்புகொள்ள வசதியாகஅவர்களுக்குக் கைத்தொலைபேசிகளை வழங்குகின்றோம். சில நேரங்களில் இந்தக் கைத்தொலைபேசி மூலம் அனாவசியமான பல பிரச்சினைகளும் எழவே செய்கின்றன என்பதை அன்றாடம் நாம் காணும், கேள்விப்படும் சம்பவங்கள் நமக்கு உணர்த்துகின்றன.
         கைத்தொலைபேசி மூலம் வழிதவறிப் போய் பிழையான தொடர்புகளில் அனேகர் எல்லா நேரங்களிலும் வேண்டுமென்றே அத்தவறை இழைத்தவர்கள் என்று சொல்வதற்க்கில்லை. தற்செயலான நிகழ்வுகள் கூட அத்தகைய சிக்கல்களில் அவர்களை மாட்டிவிடக்கூடும் என்பதையும் நாம் நினைவிற்கொள்ள வேண்டும். உதாரணத்துக்கு ஒரிரு சம்பவங்களை மட்டும் பார்ப்போம்.
             ஒரு “மிஸ் காலா” லும் “மிஸ்” ஸாகலாக
         முன்பின் அறிமுகமற்ற ஒர் இலக்கத்தில் இருந்து ஒர் அழைப்பு வருகிறது. யாராய் இருக்கும் என்ற யோசனையோடு கைப்பேசியை இயக்கினால், ராங் நம்பர்.
        “ஹலோ இம்தியாஸ், எப்படி இருக்கே?”
        “ஸாரி, இது இம்தியாஸோட நம்பர் கிடையாது”
        “அப்போ நீங்க யாரு பேசுறீங்க?”
        “நான் ஷபீனா”
        இப்படியாகத் தற்செயலாகத் தொடங்கி உரையாடல்கள் மூலம் பிள்ளைகள் தேவையில்லாத சிக்கல்களில் மாட்டிக் கொள்கின்றனர் என்பது நிதர்சனம். எனவே பெற்றோராகிய நாம், பிள்ளைகளுக்கு, மிக முக்கியமாகப் பெண் பிள்ளைகளுக்கு தேவையான அறிவுறுத்தல்களையும் வழங்க வேண்டும். அதில் மிக முக்கியமான ஒன்று, அறிமுகமற்ற எண்களில் இருந்து வரும் அழைப்புக்களுடன் தொடர்பு ஏற்படுத்த முயற்சிக்கக்கூடாது என்பதாக இருக்க வேண்டும். முடியுமாக இருந்தால், சிம் கார்டு வாங்கும்போதே (”மைஃபைவ் நம்பர்ஸ்” என்பது போல) குறிப்பிட்டஎண்களை மட்டுமே தொடர்புகளைத் திட்டவட்டமாக வரையறுத்துக் கொடுக்க வேண்டும்.
        தவிர்க்க முடியாத சந்தர்ப்பத்தில் மட்டும் பதின்ம(teenage) வயதுப் பிள்ளைகளின் உபயோகத்திற்கு கைத்தொலைபேசி வழங்க வேண்டுமே தவிர, அவ்வாறு வழங்குவதை இயன்றளவு தவிர, கொள்வதே நல்லது. பதிலாக, வீட்டில்லோ விடுதியிலோ உள்ள பொது தொலைபேசிப் உபயோகத்தை ஊக்குவிக்கலாம். தவிர்க்க முடியாத நிலையில் கைப்பேசி ஒன்றை நம் பிள்ளையிடம் வழங்கினாலும்கூட, அவர்கள் யாருடன் உரையாடுகிறார்கள், யாருக்கு குறுஞ் செய்தி அனுப்புகிறார்கள், எவ்வளவு நேரம் உரையாகிறார்கள், அவர்களின் கைப்பேசிக்கு மாதாந்திரம் எவ்வளவு கட்டணம் வருகிறது என்பதான விபரங்களைப்  பெற்றோராகிய நாம் கட்டயாம் தெரிந்துவைத்திருக்க வேண்டும்.
        எனக்கு தெரிந்த ஒரு குடும்பத்தில் உள்ள இளம் வயதுப் பெண் பிள்ளையின் உபயோகத்திற்கு ஒரு கைப்பேசி கொடுத்திருந்தார்கள். அவளும் தன் வகுப்புத் தோழியருடன் உரையாடுவதோடு, தனக்கு நண்பிகளிடம் இருந்து வரும் சுவையான, தன் வயதுக்குரிய குறுஞ்செய்திகளை தன்னுடைய நண்பியர் வட்டத்தில் பரிமாறி வந்தாள்.
இந்நிலையில் இருவார விடுமுறையில் வெளிநாட்டில் இருந்து அவளின் சகோதரான் வீடு வந்திருந்தான் அத்தகைய குறுகிய காலத்துக்கு தனியாக ஒரு சிம் கார்டு வாங்காமல் தற்காலிகமாகப் பயன்பாடுத்திக் கொள்ளுமாறு தங்கை அண்ணனிடம் அதனைக் கொடுத்துவிட்டாள். இரண்டு தினங்கள் கடந்திருக்கும். திடீரென்று ஒர் அழைப்பு.ஆண் குரல்லென்று பேசுகிறது. அண்ணனுக்குக் கோபம் பொத்துக்கொண்டு வருகின்றது. அவர் அந்த குரலுக்குரியவரைத்திட்ட, அந்த நபர் பதிலுக்குதிட்ட என்று ஒரே களேபரம் தொலைபேசி உரையாடல் முடிவுற்றும் வீட்டில் பூகம்பம் வெடித்திருக்கும் என்பதைச் சொல்லவே தேவையில்லை.
        தீர விசாரித்துப் பார்த்ததில் தெரிய வந்த விடயம் அனைவரையும் திகைப்பில் ஆழ்த்தியது. எதிர் முனையில் பேசிய அந்த பையன் தன்னுடைய தங்கைக்கு அடிக்கடி எஸ்.எம்.எஸ். என்னும் குறுஞ்செய்தி வருவதும் அவள் அவற்றைப் பார்த்துவிட்டுச் சிரிப்பதுமாய் இருப்பதைத் தொடர்ந்து அவதானித்த அந்தப் பையனுக்கு ஒருவிதமான சந்தேகம் எற்படுகின்றது. எனவே, தங்கை தனது கைபேசியை வைத்துவிட்டுக் குளிக்கப்போன தருணத்தில் அதை எடுத்து அராய்ந்து பார்க்கிறான். ஒரு குறிப்பிட்ட எண்ணில் இருந்து வந்த குறுஞ்செய்திகள் அவனுக்கு ஐயத்தை ஏற்படுத்துகின்றன.
        எனவே, அவன் அந்த எண்ணைத் தொடர்பு கொண்டு யார் என்று அறிய விழைகின்றான்.எதிர்தரப்பில் ஓர் ஆண்குரல் ஒலிப்பதைக் கேட்டு ஆத்திரம் கொள்கின்றான். இங்கு,இரண்டு தரப்பிலும் ஏற்படுகின்ற கொந்தளிப்பான நிலை மைக்குக் காரணம், அவ்விரு            இளம் பெண்பிள்ளைகளும் தவறுசெய்தமைஅல்ல. மாறாக, சந்தர்ப்ப சூழ்நிலைகள் அவர்களைக் குற்றவாளிகளாகக் காட்டியமையே.
        ஆனால், இங்கே நாம் சிந்திக்க வேண்டிய ஒரு செய்தி பொதிந்துள்ளது. நம்முடைய பெண்பிள்ளைகள் கைப்பேசி வழியே தமது நம்பியருடன் மட்டும் தொடர்புகொள்ளக் கூடியவர்களாக இருக்கலாம். எனினும், அந்தத் தொடர்பின்போது, எதிர்ப்பராத வகையில் அப்பெண்ணின் உறவினரான் ஆண்களின் கைக்கு அக்கைபேசி சென்றடைய நேர்ந்தால், விரும்பத் தகாத விளைவுகள் ஏற்பட இடமுண்டு என்பது கருத்திற்கொள்ளப்பட வேண்டும்.
        சிலபோது, மேலே நாம் சொன்னதுபோல தம் வீட்டுப் பெண் பிள்ளையைக் கண்காணிக்கும் நோக்கிலோ, அல்லது தம் வீட்டுப் பெண்ணின் தோழியைச் சீண்டி விளையாடும் நோக்கிலோ இன்னொரு வகையில் சொல்வதானால், நல்ல நோக்கத்தின் விளைவாகவே தீய எண்ணத்தின் விளைவாகவே ஒரு பெண்பிள்ளைக்கு தனது நண்பியின் கைப்பேசி எண்ணில் இருந்து ஆண்கள் மூலமும் அழைப்புக் கிடைக்கவாய்ப்பு உண்டு என்ற விழிப்புணர்வு நம்முடைய பெண்பிள்ளைகளுக்கு ஊட்டப்பட வேண்டும்.
        எனவே, வழியிலோ வகுப்பிலோ கண்டு சில நாள் பழகும் எந்த ஒரு தோழியை நம்பியும் சட்டென்று நம்முடைய கைப்பேசி எண்னைக் கொடுக்கவே கூடாது என்ற அறிவுறுத்தலை நாம் நமது பிள்ளைகளுக்குக் கண்டிப்பாக வழங்க வேண்டும். எதிர் பாராத வகையில் யாரேனும் ஆண்களிடமிருந்து கைப்பேசியில் அழைப்பு வருமாயின் எக்காரணம் கொண்டும் பேச்சை வளர்க்காமல் உடனே தொடர்பைத் துண்டித்துவிட வேண்டும்.
        அப்படி செய்யாத பட்சத்தில் எற்படக்கூடிய எதிரபாராத விளைவுகளால் எவ்வளவு தூரம் தன்னுடையதும் குடும்பத்தினதும் மானம் சீர்குலைய வாய்ப்புண்டு என்பன பற்றியெல்லாம் நல்ல முறையில் சினேபூவமாக நம்முடைய பிள்ளைகளுக்கு உரிய வசதிகளைச் செய்து கொடுப்பதோடு நம் கடமை முடிந்துவிடுவதில்லை. மாறாக, அதை அவர்கள் நல்லமுறையில் பயன்படுத்துகின்றார்களா என்பதை அவ்வப்போது உறுதிப்படுத்திக் கொள்வதும் நம்முடைய கடமையாகும்.

Sunday, 27 November 2011

உடற்பயிற்சி செய்தால் அதிகமாக சாப்பிடலாம்


உடற்பயிற்சி செய்தால் கூடுதலாக உண்ணலாம் என்று ஆய்வில் தெரிய வந்துள்ளது. அமெரிக்காவின் ஹார்வர்டு பல்கலைக்கழகத்தில் பணிபுரியும் டாக்டர் "மிகைல் அலோன்சோ' என்பவரின் தலைமையிலான குழுவினரே மேற்கண்ட முடிவைத் தெரிவித்துள்ளனர். பல்வேறு கட்ட ஆராய்ச்சிகளுக்குப் பின்னரே இம்முடிவை இவர்கள் எட்டியுள்ளதாகத் தெரிகிறது.
ஒரு நபர் தன் உடல் தன்மைக்கு ஏற்ற வகையில் முறையான உடற்பயிற்சிகளில் ஈடுபடுவாரேயானால், அவர் எடுத்துக் கொள்ளும் உணவும் உடலுக்கு ஏற்ற விதத்திலான அளவிலேயே அமையும் என்பது தெரிந்த விஷயம்தான்.

இப்போது நடைபெற்ற ஆராய்ச்சியில், அது உறுதி செய்யப்பட்டிருப்பதோடு, உணவின் தரமும், அளவும் கூடுதலாகும் என்பது கண்டுபிடிக்கப்பட்டுள்ளது. உடற்பயிற்சியின் அளவு கூடுதலானால் உட்கொள்ளும் உணவின் தரம், அதாவது சத்து நிறைந்த உணவு கூடுதலாக உண்ணப்படுகிறது. ( உடற்பயிற்சியின் போது உணவுப் பணவீக்க குறியீட்டை தயவு செய்து மறந்து விடுதல் நலம்).

தசைரீதியான உடற்பயிற்சிகள் சத்து நிறைந்த உணவை எடுத்துக் கொள்ளத் தூண்டுகிறது. உடல் எடைக் குறைப்புக்காக செய்யப்படும் உடற்பயிற்சிகள் உடல் பருமனைக் குறைக்கின்றன. அதற்கேற்ற உணவுப் பழக்கத்தை நீண்ட காலத்துக்குப் பின்பற்றி வந்தால் நல்ல பலனைத் தருகின்றன.

முந்தைய ஆராய்ச்சிகளின் மூலம் உடற்பயிற்சிகள் மூளைக்கு நல்ல விளைவை அளிப்பது தெரிய வந்தது. குறிப்பாக உடலுக்கு வலுவை அளிக்காத உணவை உண்பது தவிர்க்கப்பட்டது. உடற்பயிற்சிகளின் விளைவாக மூளையிலுள்ள சாம்பல் நிறப் பகுதிகள் அதிகரிப்பது இப்போதைய ஆராய்ச்சியில் கண்டுபிடிக்கப்பட்டுள்ளது.

வெள்ளத்தில் மிதக்கிறது தமிழகம்

சென்னை : தமிழகத்தில் பெய்து வரும் கன மழையால் பல மாவட்டங்களில் வீடுகளுக்குள் வெள்ளம் புகுந்துள்ளது. பல ஆயிரம் ஏக்கர் பயிர்கள் வெள்ள நீரில் மூழ்கியுள்ளன. தொடர் மழை காரணமாக பல கிராமங்களில் சாலைகள் துண்டிக்கப்பட்டுள்ளன. நிவாரணப் பணிகளை அரசு மேற்கொள்ளாததால் மக்கள் அவதிக்குள்ளாகி உள்ளனர். இதற்கிடையே, கன்னியாகுமரி அருகே மையம் கொண்டிருந்த குறைந்த காற்றழுத்த தாழ்வு பகுதி வலுவடைந்து, புயல் சின்னமாக மாறியுள்ளது. இதனால், தமிழகத்தில் பெரும்பாலான இடங்களில் கனமழை பெய்யும் என்று சென்னை வானிலை ஆய்வு மையம் தெரிவித்துள்ளது.
தமிழகத்தில் வட கிழக்கு பருவ மழை தொடங்கியது. அதன் தொடர்ச்சியாக வங்கக் கடலில் 3 காற்றழுத்த தாழ்வு நிலை உருவானது. இதனால், தமிழகம் முழுவதும் பரவலாக கன மழை பெய்தது. அணைகள், ஏரி, குளங்கள் நிரம்பியது. ஆறுகளிலும் வெள்ளப் பெருக்கு ஏற்பட்டது. தாழ்வான பகுதிகளில் தண்ணீர் தேங்கியது. பொதுமக்கள் பெரும் இன்னலுக்கு ஆளாகினர்.

வடகிழக்கு பருவமழை தொடர்ச்சியாக 4வது முறையாக நேற்று முன்தினம் கன்னியாகுமரி கடல் பகுதியில் குறைந்த காற்றழுத்த தாழ்வு பகுதி உருவானது. இதனால், குமரி முதல் சென்னை வரை கடலோர மாவட்டங்களில் பரவலாக கனமழை பெய்து வருகிறது. மக்கள் வெளியே செல்ல முடியாமல், வீடுகளுக்குள்ளே முடங்கும் நிலை உருவாகியுள்ளது.இதில் அதிகபட்சமாக மதுராந்தகத்தில் நேற்று 190 மிமீ, விருதாச்சலம் 170 மிமீ, மாமல்லபுரம் 160 மிமீ, தொழுதூர் 150 மிமீ, செங்கல்பட்டு 140 மிமீ, சேத்தியாதோப்பு 140 மிமீ மழை பெய்துள்ளது. மற்ற இடங்களிலும் பரவலாக மழை பெய்து வருகிறது.
இந்நிலையில், குறைந்த காற்றழுத்த தாழ்வு பகுதி, மேலும் வலுவடைந்து புயல் சின்னமாக மாறியுள்ளது. இது திருவனந்தபுரத்தின் தென் கிழக்கே 120 கிமீ தொலையில் கடலில் மையம் கொண்டுள்ளது. இதனால், நேற்று காலையில் தென் தமிழகத்தில் மிக கனமழை பெய்து வருகிறது. தூத்துக்குடியில் நேற்று பகல் மட்டும் 50 மிமீ, பாளையங்கோட்டை 32 மிமீ, கன்னியாகுமரி 30 மிமீ மழை பெய்துள்ளது.

குறைந்த காற்றழுத்த தாழ்வு மண்டலம் காரணமாக பாம்பன், ராமேஸ்வரம், தூத்துக்குடி துறைமுகங்களில் புயல் எச்சரிக்கை கூண்டு (எண்.3) ஏற்றப்பட்டுள்ளது. நேற்று மாலை அந்த குறைந்த காற்றழுத்த தாழ்வு மண்டலம் வடமேற்கு திசையில் நகரத்தொடங்கியது. இதனால், சென்னை துறைமுகத்தில் எச்சரிக்கை விடப்பட்டுள்ளது. கடல் பகுதியில் மணிக்கு 50ல் இருந்து 65 கிமீ வேகத்தில் தரைப்பகுதியை நோக்கி காற்று வீசும். கடலில் சீற்றமும் அதிகம்இருக்கும் என்பதால், தமிழகம் புதுச்சேரி கடலோர பகுதியில் வசிக்கும் மீனவர்கள் கடலுக்குள் மீன்படிக்க செல்ல வேண்டாம் என எச்சரிக்கப்பட்டுள்ளனர்.

இந்த குறைந்த காற்றழுத்த தாழ்வு மண்டலம் காரணமாக, தென்மாவட்டங்களில் மழை தொடர்ந்து பெய்யும். மேலும், அது வடமேற்கு திசையில் நகர்வதால், சென்னை, திருவள்ளூர், காஞ்சிபுரம் மாவட்டங்களில் இன்றும், நாளையும் கனமழை பெய்யும் என்று சென்னை வானிலை ஆய்வு மையம் தெரிவித்துள்ளது.
இதற்கிடையில் கடந்த இருநாட்களாக பெய்த தொடர் மழைக்கு, நெல்லை, தூத்துக்குடி மாவட்டங்கள் கடுமையாக பாதிக்கப்பட்டன. திருச்செந்தூர், ஜெகதாபட்டினம் உள்ளிட்ட இடங்களில் 200க்கும் மேற்பட்ட படகுகள் உடைந்து சேதமடைந்தன. தஞ்சை, திருவாரூர், நாகைப்பட்டினம் ஆகிய மாவட்டங்களில் பெய்த தொடர் மழைக்கு 25 ஆயிரம் ஏக்கர் பயிர்கள் தண்ணீரில் மூழ்கின. ராமநாதபுரம் மாவட்டத்தில் ரோடுகள் சேதமடைந்தன.

திண்டுக்கல் மாவட்டம் கொடைக்கானலில் பலத்த காற்றுடன் விடிய விடிய கொட்டித் தீர்த்தது கனமழை. 50 மலை கிராமங்களில் மின் விநியோகம் துண்டிக்கப்பட்டது. செங்குளம், துரைசாமிபுரம் ஆகிய இடங்களில் கண்மாய்கள் உடைந்தன. ராமநாதபுரத்தில் 200 ஏக்கர் பயிர்கள் தண்ணீரில் மூழ்கின. சிவகங்கை மாவட்டத்தில் சுமார் ஆயிரம் ஏக்கர் பயிர்கள் மூழ்கின. திருச்சி திருவெரும்பூர் அருகே சுவர் இடிந்து விழுந்து ஒரு பெண் பலியானார். திருவண்ணாமலை மாவட்டம் வந்தவாசியில் சுவர் இடிந்து விழுந்து சிறுவன் உட்பட 2 பேர் பலியாகினர்.

சென்னையில் புளியந்தோப்பு, கொடுங்கையூர், மாங்காடு, மடிப்பாக்கம், வேளச்சேரி, ஆதம்பாக்கம் ஆகிய இடங்கள் தண்ணீரில் மிதக்கின்றன. பொதுமக்கள் வீடுகளை காலி செய்து விட்டு தெரிந்தவர்களின் வீடுகளில் அடைக்கலம் புகுந்துள்ள னர். திருவாரூர் மாவட்டத்தில் அரசு மருத்துமனைக்குள்ளும் தண்ணீர் புகுந்தது. கடலூர், சிதம்பரம் ஆகிய இடங்களிலும் கொட்டிய கன மழைக்கு பல வீடுகள் தண்ணீரில் மிதக்கின்றன.
வீடுகளுக்குள் தண்ணீர் தேங்கியதால் பொதுமக்கள் தங்குவதற்கு அரசு பல இடங்களில் மாற்று ஏற்பாடுகளைச் செய்யவில்லை. அவர்கள் சாப்பாடும் ஏற்பாடு செய்யவில்லை. தண்ணீரை வெளியேற்றவும் நடவடிக்கை எடுக்கவில்லை. போர்க்கால அடிப்படையில் செய்ய வேண்டிய பணிகள் எல்லாம் செய்யப்படாமல் உள்ளன. அமைச்சர்கள் யாரும் மாவட்டங்களுக்குச் சென்று வெள்ள நிவாரணப் பணிகளை மேற்கொள்ளவில்லை. சென்னையில் மேயர் உட்பட யாரும் பாதிக்கப்பட்ட பகுதிகளை பார்வையிடவில்லை. அமைச்சர்களும், அரசு அதிகாரிகளும் நிவாரணப் பணிகளை மேற்கொள்ளாததால் மக்கள் மிகவும் அவதிக்குள்ளாகியுள்ளனர்.

மிஸ்டர் கலைஞரே! இப்போ உமக்கு வலிக்கிறதா?

அரசனாகட்டுமே!
அரசியாகட்டுமே!
குற்றங்கள் யார் செய்தாலும் தட்டிக்கேட்டுத் தடுப்பேன்!
தர்மத்தின் பக்கம் இருப்பேன்!
Karunanidhi
இது ஒரு திரைப்பட பாடல் வரியாக இருந்தாலும், இதைத்தான் பெரும்பாலான அரசியல்வாதிகள் தாங்கள் பதவி ஏற்கும் போதும் அந்த பதவிக்காக மக்களிடம் ஓட்டுப்பிச்சை கேட்கும் போதும் உபயோகப்படுத்தும் வார்த்தைகள். “நியாயம், நேர்மை, உழைப்பு, உண்மை தான் முக்கியம், சட்டத்திற்கு புரம்பாக யார் செயல்பட்டாலும் அது எனக்கு நெருங்கிய உறவினராக இருந்தாலும் அவர்களுக்கு சாதகமாக செயல்பட மாட்டேன்” என்றெல்லாம் அரசியல்வாதிகள் வாய்கிழிய பேசுவார்கள் என்பது அனைவருக்கும் தெரிந்த ஒன்றுதான்.
இதைப்பற்றி பேசுவதற்கு இப்போ என்ன இருக்கிறது என்று நினைக்கிறீர்களா? ஆம்! காரணம் இருக்கிறது. இதே பல்லவியை பாடித்தான் தமிழக முதல்வராக 5 முறை பதவி ஏற்றிருக்கிறார் கலைஞர் கருணாநிதி. இதை அவர் பின்பற்றவில்லை என்பதை நாம் அறிந்திருந்தாலும், தற்போது தனது மகள் கனிமொழி குற்றவாளிக்கூண்டில் நிறுத்தப்பட்டிருக்கிறபோது என்னவோ நீதியே செத்துவிட்டது போன்று பேட்டிகளை கொடுத்து வருகிறார் கலைஞர்.
“கனிமொழிக்கு ஜாமீன் கிடையாது (கடல்லயே இல்லையாம்!) என்று வடிவேலு காமெடி ஸ்டைலில் டெல்லி உயர்நீதிமன்றம் கூறிவிட “நீதி தாமதிக்கப்படுவதால் மனதிற்கு நெருடலை ஏற்படுத்துகிறது!” என்று வசனம் பேசியுள்ளார் கலைஞர்.
kanimozhi
கனிமொழி கைது செய்யப்பட்டபோது கண்கலங்கிய அவரது தாயார்

“2ஜி” அப்படியென்றால் என்னவென்ற அறியாத மக்களுக்கு கூட “2ஜி ஸ்பெக்டர்ம் ஊழல்” பற்றி அறிந்துள்ளார்கள் இந்திய மக்கள். 1 லட்சத்தி 76 ஆயிரம் கோடி (ஸாரி! நம்பரில் எழுத நமக்கு தெரியவில்லை) ரூபாய் ஊழல் நடைபெற்ற அலை ஒதுக்கீட்டில் மத்திய தொலை தொடர்பு மந்திரியாக இருந்த ஆர். ராசாவும் கலைஞரின் மகளான் கனிமொழியும் இன்று திகார் ஜெயிலில் அடைபட்டுக்கிடக்கிறார்கள். எத்தனை நாட்களாக? சில மாதங்களாகத்தான்.
கனிமொழிக்கு ஜாமீன் கிடைக்கவில்லை என்ற் செய்தி வந்ததும் அவரின் தாயார் அழுது கண்ணீர் வடித்தார்! மாற்றுக் கருத்து இல்லை, தாயாக இருந்ததினால் கண்ணீ வருவது இயல்புதான். தகப்பனாக இருப்பினும் தனது மகள் சிறைச்சாலையில் அடைப்பட்டு கிடக்கும் போது வருத்தமாகத்தான் இருக்கும்.
ஆனால் நீங்கள் முதலமைச்சராக இருந்த போது கோவை சிறைவாசிகளின் குடும்பத்தார்களின் அழுகுரல்கள் உங்களது காதினில் ஏன் விழவில்லை? குற்றம் நிரூபிக்கப்படாமலேயே எத்துனை ஆண்டுகளாக சிறையில் வாடிக்கொண்டிருக்கிறார்கள் என்பது உங்களுக்கு தெரியாதோ?
CB13--MUSLIMS_807008f
கோவை மத்திய சிறையில் வாடும் முஸ்லிம்களின் குடும்பத்தார்கள்
kovai
கோவை குண்டுவெடிப்பில் குற்றவாளியாக ஆக்கப்பட்டு பல ஆண்டுகாலம் சிறையில் இருந்துவிட்டு பின்னர் நிரபராதி என்று விடுதலை செய்யப்பட்ட கோவை முஸ்லிம்கள்
ஒவ்வொரு வருடமும் அண்ணா பிறந்த நாளின் போது கருணையின் அடிப்படையில் குற்றவாளிகள் விடுதலை செய்யப்படும் போது இந்த முறை எனது கணவர் விடுதலை செய்யப்படுவார்! இந்த முறை எனது மகன் விடுதலை அடைந்துவிடுவான்! இந்த முறை எனது அப்பா வீட்டிற்கு வந்துவிடுவார்! என்று ஒவ்வொரு முறையும் ஏக்கத்தோடு எதிர்பார்த்து ஏமாந்து போன குடும்பத்தார்கள் பட்ட மன வேதனை இப்போது புரிந்திருக்குமே!
kovia sun
தனது மகனின் விடுதலை எதிர்பார்க்கும் ஒரு தந்தை
ஒவ்வொரு வருடமும் இஸ்லாமிய இயக்கங்கள் கோவை சிறைவாசிகளை விடுதலை செய்யவேண்டும் எனக் கோரிக்கை வைத்து ஆர்பாட்டங்கள் நடத்தினார்களே! அவற்றையெல்லாம் கொஞ்சம் கூட பொருட்படுத்தவில்லையே! அது ஏன்?
கோவை சிறைவாசிகளின் விடுதலைக்காக போராட்டம் நடத்திய பாப்புலர் ஃப்ரண்ட் ஆஃப் இந்தியா (இடம்: கோவை)
பல ஆண்டுகள் அரசியில் வாழ்க்கை வாழ்ந்து கோடிக்கணக்கில் சொத்து சேர்த்து வைத்திருக்கிறீர்கள். உங்களுக்கு உணவு பிரச்சனை என்றால் என்ன? என்பதே உங்களுக்கு தெரியாது. ஆனால் அன்றாடம் கோவை சிறைவாசிகளின் குடும்பத்தார்கள் உணவுக்குக்கூட கஷ்டப்படுவது உங்களுக்கு தெரிந்திருக்க வாய்பில்லை.
இளமையோடு சிறைக்குள் நுழைந்தவர்கள் முதுமை அடைந்த பிறகும் அவர்களை விடுவிக்க மனம் வராத உங்களுக்கு சில மாதங்கள் அதுவும் சிறைச்சாலையில் முதல் வகுப்பில் இருக்கும் உங்கள் மகளுக்காக ஏங்குகிறீர்களே! உங்களுக்கொரு நியாயம்! மற்றவர்களுக்கு ஒரு நியாயமா?
சமத்துவம், நீதி, நியாயம் போன்ற வார்த்தைகளெல்லாம் முஸ்லிம்களிடத்தில் ஓட்டு வாங்குவதற்காக மட்டுமே நீங்கள் பயன்படுத்திய வார்த்தைகள்! இனியும் உங்களை இந்த சமுதாயம் நம்பிக்கொண்டிருக்கும் என்று எதிர்ப்பார்க்காதீர்கள்.
மக்களின் குறைகளை அறிந்து கொள்ள முடியாத நீங்கள் நிச்சயமாக ஒரு தலைவனும் அல்ல! கலைஞனும் அல்ல!